Beinvegni a la Canorta rumantscha

Chars geniturs ed autras persunas interessadas da lingua rumantscha

 

Nus essan ina gruppa da geniturs rumantschs cun uffants pitschens ed abitain en la regiun da Turitg. Malgrà che nus vivain en in ambient tudestg e la gronda part da nus ha in partenari/ina partenaria da lingua tudestga, resta il rumantsch ina part da noss'identitad. A nus statti perquai fitg a cor da dar vinavant a noss uffants questa lingua.

 Per pudair sustegnair ils uffants er ordaifer l'ambient famigliar d'emprender rumantsch avain nus realisà en collavuraziun cun la Fundaziun GFZ la Canorta Rumantscha Turitg.

La Canorta Rumantscha Turitg è averta per tut ils idioms rumantschs.

 

Nus ans legrain da Voss messadi!

 

L'Uniun Canorta Rumantscha Turitg (CRT)


Purschida da tgira

  • 1 di l'emna, mintgamai il glindesdi (cun la pussaivladad d'extender tenor basegn sin dus u plirs dis)
  • temps d'avertura 7.30 – 18.00 (10,5 uras)
  • differentas vegliadetgnas

  • 12,5 plazs da tgira, da quels max. 3 pops
  • custs: pops fin 18 mais CHF 145/di, silsuenter CHF 125/di (nagins plazs subvenziunads)

Il mintgadi da tgira è la fatschenta principala da la Fundaziun GFZ. En il center da tut las activitads stat l'uffant. L'incumbensa principala è il sustegn dal svilup persunal dals uffants, la promoziun da l'integraziun sociala e culturala dals uffants e la collavuraziun cun ils geniturs. Co che questa finamira vegn cuntanschida è descrit en il concept pedagogic da la Fundaziun GFZ. Il focus linguistic vegn mess exclusivamain sin la lingua rumantscha.

 

La purschida da furmaziun da la Canorta Rumantscha Turitg vegn realisada tenor il standard d'orientaziun da la furmaziun da la GFZ. Quel sa basa sin la tenuta pedagogica da porscher sustegn als uffants, sco essers ch'èn davent da l'entschatta activs e che emprendan, per ch'els possian cundiriger lur atgna via da furmaziun.

 

Cun "furmaziun en ina fasa tempriva da l'uffanza" chapin nus il rom cun relaziuns fidadas ed in ambient stimulant e ritg d'experientschas che nus mettain a disposiziun e che permetta als uffants davent da l'entschatta da persequitar lur agens interess e da far experientschas d'emprender impurtantas. La furmaziun en ina fasa tempriva da l'uffanza sa basa sin las activitads ed il gieu dals uffants, ed ella sa differenziescha essenzialmain da la furmaziun en scola u da programs da promoziun specifics per uffants pitschens. La lavur s'orientescha cleramain als basegns da svilup e d'emprender dals uffants ed a la collavuraziun cun ils geniturs.