La Suprastanza sa preschenta
Gugent vulain nus preschentar nus sezs e noss project da la Canorta Rumantscha Turitg. Nus essan ina gruppa da geniturs rumantschs cun uffants pitschens ed abitain en la regiun da Turitg.
Malgrà che nus vivain en in ambient tudestg ed ils blers da nus han in partenari/ina partenaria da lingua tudestga, resta il rumantsch ina part da noss'identitad. A nus statti perquai fitg a cor da dar vinavant a noss uffants questa lingua.
Per pudair sustegnair ils uffants er ordaifer l'ambient famigliar d'emprender rumantsch avain nus fundà la "Canorta Rumantscha Turitg".
GIAN ANDRI CAVIEZEL
President, lavur da publicitad
Gian Andri Caviezel es da professiun indschegner e viva cun sia duonna, duos figls ed üna figlia a Fällanden. Seis temp liber passainta el gugent cun tuot la famiglia in Engiadina ed our'illa natüra intuorn il Greifensee.
FEDERICA POLTERA
Cassiera
Federica Poltera è carscheida se a Turitg ed abitescha anc adegna cò. Ella lavoura scu pedagoga cuartiva. Igl mintga de vign betg angal accumpagnea digl tudestg mabagn er da rumantsch e taliang. La trilinguitad tgi F. canoscha gio dall'atgna unfanza dat ella anavant oz, ansemen cugl sies partenari a lour unfants. Ella giolda d'explorar igl mond cun la sia famiglia, vo a nudar e ligia fitg gugent crimis.
VIOLA CADRUVI
Actuara, Website e Social Media
Viola Cadruvi abitescha cun figlias e partenari a Turitg. Ella è sezza creschida si giu la Bassa, ha dentant adina discurrì rumantsch. Ella lavura sco scolasta, scienziada litterara, columnista ed autura.
CARLA PEER
Events e logistica
Carla Peer viva cun sia figlia e lur partenari illa cità da Turich. Ella lavura sco indschegniera da software. Aint il temp liber musichescha ella, fa sport e gioda spassegiadas illa natüra culla famiglia.
FLAVIA DOBOZI-SGIER
tgira da commembras e da partenarias
Flavia Dobozi-Sgier deriva dalla Surselva, è architecta e viva cun siu um e lur affons el marcau da Turitg. Ella va fetg gugent a viagiar e gauda il temp liber oravant tut en curtin ni ella natira.